Continúa a busca do home de 50 anos desaparecido o luns en Moaña

A Garda Civil continúa cos labores de busca por terra, mar e aire de Alfonso Lorenzo Regueira, un home de 50 anos veciño da parroquia de Domaio, en Moaña (Pontevedra), que falta do seu domicilio dende a madrugada do pasado luns.

   No operativo participa a Garda Civil con patrullas rurais e fiscais, un helicóptero, e efectivos do servizo marítimo, unidades de cans e o Seprona. Ademais, colaboran a Policía Local e Protección Civil de Moaña e Cangas, a unidade canina do servizo de Protección Civil de A Estrada e veciños voluntarios.

   O dispositivo por terra estase a centrar no Monte do Faro e nas proximidades do domicilio do desaparecido, no lugar de Verdeal, mentres que o de mar abrangue o litoral dende a Ponte de Rande ata a praia de Lapamán (Bueu).

   Tal e como comunicou o Instituto Armado, o home mide 1,80 metros de altura, ten o pelo cano, é de complexión delgada-atlética, e non ten antecedentes por trastornos nin deficiencias psíquicas.

   A familia notou a súa ausencia sobre as 7,00 horas do luns e foi a primeira hora da tarde cando a súa muller presentou a denuncia pola súa desaparición no posto da Garda Civil de Moaña. Segundo trasladou a familia, o home adoita saír a camiñar, pero “nunca faltara desta forma”.