Británicos, portugueses, suízos e españois xóganse o Meeting Internacional de Optimist en Vigo

Mañá venres, día 31 de outubro, o Real Club Náutico de Vigo dará o pistoletazo de saída á última proba da Semana da Atlántico Cidade de Vigo, o Meeting Internacional de Optimist. Preto de 250 regatistas de catro países – Gran Bretaña, Suíza, Portugal e España- competirán na ría de Vigo polo triunfo final da prestixiosa cita.
 
Preto de 250 regatistas pelexarán polo triunfo

Despois do éxito do primeiro ciclo deportivo da Semana da Atlántico Cidade de Vigo, que reuniu a case 200 deportistas na auga, o Real Club Náutico de Vigo prepárase para acoller novamente a preto de 250 regatistas divididos na clase Optimist A, Optimist B, Optimist C e Cadete.
 
O Comité Organizador estableceu dous campos de regatas. Un situado nas inmediacións do Monte da Guía e o outro entre Cangas e Moaña. Fernando Giraldo, Director Técnico da Semana da Atlántico Cidade de Vigo comentaba que “mañá, en teoría, teremos boas condicións: ventos do Sur-Suroeste duns 12 nós de media e sen choiva, así que creo que poderemos completar as tres mangas previstas”.

Catro países en liza no Meeting Internacional de Optimist

Os británicos parten como claros favoritos. Arthur Fry, Oliver Hill e Julia Mellers soan en todas as quinielas para facerse co triunfo final. Os británicos, adestrados polo belga Pieter Van der Bossche, manterán un intenso man a man co suízo Harley Stome, que xa confirmou a súa presenza na cita do Real Club Náutico de Vigo.
 
Como era de esperar, a flota portuguesa volveuse a envorcar co Meeting Internacional de Optimist e máis de 50 regatistas de 12 clubs náuticos lusos acudirán á proba reina da vela lixeira do outono europeo. Non en balde, en augas olívicas decidiranse aos vencedores do Trofeo Semana do Atlántico de Optimist tras a disputa da Semana do Atlántico Cidade Viana do Castelo.
 
E todo iso sen contar coa potente flota española.
 
Sete comunidades no Meeting Internacional de Optimist

Os españois non lles porán as cousas fáciles a británicos, suízos e portugueses. Nin máis nin menos que sete comunidades autónomas –Cataluña, Baleares, País Vasco, Cantabria, Canarias, Murcia e por suposto Galicia- e 16 clubs náutico da xeografía española estarán representados no Real Club Náutico de Vigo.
 
A flota mediterránea é sen dúbida, e xunto á galega, a máis potente. O R.C.N. Palma, e o C.V. Porto de Andratx, ademais do C.N. Balis e o C.N. Cambrils porán as cartas sobre a mesa fronte a regatistas do C.N. Hondarribi, o R.C.M. Santander, o R.C.N. Laredo, o R.C.N. Gran Canaria ou o R.C.N. Cartaxena.
 
Do que non cabe a menor dúbida é que, para os galegos, o xogar en casa supón unha vantaxe, polo que todo parece indicar que os representantes do C.M. Oza O Puntal, M.R.C.E.B., C.N. Portosín, C.M. Canido, C.N. Rodeira Cangas, R.C.N. Sanxenxo e sobre todo RCN Vigo, son os rivais a bater.  
 
Mañá venres, pistoletazo de saída

Mañá venres, día 31, as flotas de Optimist A, Optimist B e Optimist C escoitarán o pistoletazo de saída a partir das 12:00 horas; 12:30 horas no caso dos máis pequenos. A partir de aí, e co sistema round robin, poderíanse completar até tres probas.