Profesores de hostalaría e sumillería de Suíza visitan a D.O. Ribeiro

O C.R.D.O. Ribeiro continúa a súa tarefa de promoción no mercado suízo, fixado como un dos destinos obxectivo no comercio exterior. Esta vez faino a través da visita á nosa Denominación de Orixe dun grupo de prescriptores das escolas de hostalería e sumillería de maior importancia en Suíza que nestes días coñeceron as adegas e viños da D.O. Ribeiro.

O programa daba comezo o domingo coa chegada de tódolos participantes e a celebración dun seminario-cata da Denominación de Orixe Ribeiro a cargo do director técnico do Consello Regulador, Pablo Vidal. O luns iniciábase o percorrido polas adegas e colleiteiros do Ribeiro, nun programa que incluíu a visita a 9 adegas: Viña Costeira, Terra do Castelo, Coto de Gomariz, Casal de Armán, Bodegas Docampo, Eduardo Peña, Viña Reboreda, Bodega Alanís e Pazo de Vieite. Durante estes días o grupo de expertos tivo a posibilidade de catar preto de 50 referencias do Ribeiro, favorecer o contacto directo cos produtores e coñecer as peculiaridades e principais características da nosa rexión vitivinícola.

O grupo, composto por cinco membros, integrou a personaxes relevantes da ensinanza do mundo do viño en Suíza, Christian Baur da Schweizer Hotelfachschule Luzern, Antonio Ruotolo e Ruth Knöpfel do César Ritz Colleges Switzerland, Manfred Wagner do Schulhotel der Hotel und Touristikfachschule Chur e Marc Herbin do Glion Institut de Hautes Etudes.

Esta aproximación aos líderes de opinión no mercado suízo está a acadar bos resultados, xa que neste novo achegamento os viños do Ribeiro están a ser percibidos como elaboracións de alta calidade e personalidade, coa autenticidade propia dunha rexión vitivinícola que posúe unha das maiores riquezas varietais no mundo do viño, así como unha das máis dilatadas traxectorias históricas na súa elaboración.