Finalizan os traballos de asfaltado e acondicionamento en varios camiños do barrio de Moreira

Anticipando a chegada das choivas propias do inverno, o Concello de Soutomaior finalizará nos últimos días as obras de acondicionamento e asfaltado en diversos camiños do barrio de Moreira. O alcalde, Agustín Reguera, visitou esta mañá os traballos acompañado polo concelleiro de Medio Ambiente, Ramón Fernández, para comprobar o estado das obras. O proxecto conta cun orzamento total de licitación de 40.840 euros, IVE incluído.

Dada a ampla superficie do concello de Soutomaior, e o gran número de estradas e camiños existentes, a tarefa de mantelas todas en perfecto estado é complicada e require constantes proxectos de pavimentación, que rexeneren a capa de rodaxe, e a instalación de novas cunetas para canalizar as augas pluviais. Con esta intención, e para previr posibles problemas derivados das choivas do próximo inverno, o goberno local acometeu estes traballos no barrio de Moreira.

As obras de mellora consisten na instalación de aglomerado asfáltico nos camiños de Rodeiro, Sucadiña e viarios de acceso a casas da zona. Do mesmo xeito, instaláronse un total de 730 metros lineais de cunetas na estrada de acceso ao barrio de Moreira. Unha medida con dobre función, mellorar a seguridade viaria de devandita estrada ao aumentar a súa capacidade de drenaxe de pluviais evitando posibles acumulacións de auga ademais de prolongar a vida útil da nova capa de rodaxe.

Os traballos inclúen a instalación de accesos a diversas leiras da zona con canalizacións interiores a fin de permitir a circulación subterránea da auga de maneira que se sigan respectando os tradicionais circuítos de regadío, tan importantes para moitos veciños da zona e que supuñan unha das súas principais preocupacións.

O alcalde de Soutomaior, Agustín Reguera, mostrou a súa satisfacción coa calidade destes traballos e, que sumados aos realizados recentemente, como o asfaltado dos camiños que unen o barrio con O Castelo e a ampliación na rede de saneamento, “contribuirán a mellorar sensiblemente a calidade de vida dos veciños do barrio de Moreira”, afirmou o rexedor local.