A veciña da Laracha Josefa Velo celebra o seu 102 aniversario
Dona Josefa Velo Amor celebrou o seu 102 aniversario na vivenda do lugar de Curros (parroquia de Soandres) na que reside con María (filla), Manuel (xenro) e Ángel (neto).
Nesta data tan especial, Josefa estivo acompañada tamén polos demais familiares como a súa irmá Aurora, os outros dous netos e os tres bisnetos.
Así mesmo, recibiu as felicitacións de amigos e veciños. Entre eles, o sacerdote da parroquia de Soandres, D. Manuel Mallo, e tamén do alcalde, José Manuel López Varela que, tal e como é habitual, agasallou á señora Josefa cunha placa conmemorativa e un ramo de flores en nome do Concello da Laracha.
Josefa Velo é a segunda persoa de maior idade das case 11.500 que residen no Concello da Laracha. Actualmente son cinco os veciños do municipio que superan os cen anos de idade.