Soutomaior ultima os traballos nos centros educativos para o inicio do novo curso
Os centros de ensino do Concello de Soutomaior acollen durante as últimas semanas varias obras de mellora nas súas instalacións co obxectivo de satisfacer as necesidades de profesores e alumnos de cara ao comezo do próximo curso escolar. Os traballos inclúen diversas melloras e reparacións nas aulas, patios de recreo e instalacións exteriores, nun total de catro centros educativos.
Durante o verán, os colexios de Soutomaior pechan as súas portas para dar un descanso tanto aos seus alumnos como aos seus profesores. Momento que o Concello aproveita para realizar diversas obras de mellora e mantemento nos seus centros educativos.
No colexio infantil de Romaríz renovouse a pintura da aula ademais de mellorar a calefacción da mesma, como solicitaran as profesoras do centro. No patio de recreo infantil, despois dunha revisión de seguridade, instaláronse proteccións nas columnas para evitar posibles accidentes que puidesen afectar á seguridade dos menores. Por último, tamén se renovou a pintura de diversas zonas especialmente desgastadas.
O C.P.I. Manuel Padín Truiteiro é outro dos centros que máis traballos acolle durante este mes nos seus edificios de primaria e Secundaria. Ademais dos traballos para renovar a pintura de varias aulas, cuartos de aseo, e zonas de comedor… colocarase unha rede no patio de xogos e revisaranse todas as persianas para que estean en perfecto estado cando se inicie o curso.
A escola infantil “A galiña azul” tamén se está preparando para o ano escolar co repintado de varias das aulas, corredores ademais das clásicas revisións de seguridade.
Para finalizar, no edificio de educación infantil en Arcade, ampliarase a cuberta da fachada para protexer aos nenos que teñan que coller o autobús ademais doutras obras de mellora para incrementar a seguridade e comodidade dos pequenos.
Con estes traballos o Concello de Soutomaior pretende ofrecer unha mellora na calidade das súas instalacións educativas a todos os seus usuarios ademais de responder as solicitudes expostas polos alumnos, pais e profesores para o inicio deste novo curso escolar.