Os torneos de basket e fútbol abren na Preguiza a “II Festa popular do deporte de Ortigueira”

O Concello pon en marcha mañá á primeira hora da mañá as primeiras actividades da “II Festa popular do deporte de Ortigueira”. Baloncesto e fútbol protagonizan a primeira das xornadas do evento que vivirá durante o fin de semana os seus momentos álxidos coa celebración da Carreira popular e o Día da Bicicleta.

A partir das 18 horas arrincará na cancha da céntrica Área deportiva da Preguiza o torneo de basket. O deporte rei tomará a testemuña no mesmo campo pola tarde, a iso das 19 horas.

A oferta para o sábado 11 de agosto inclúe, ademais da continuación dos torneos, inchables para os máis pequenos na piscina municipal, xogos de pádel na Preguiza, exhibición de kárate. Ademais, a Alameda converterase en epicentro do atletismo local, albergando a saída e a meta da Carreira popular de Ortigueira que, por segundo ano, conta coa colaboración do Club de Atletismo Alejandro Gómez. A todo iso, sumaranse, por último, o domingo, ciclismo (xincana e marcha ciclista) e taichí.

Desde o goberno local convídase a todos os veciños a seguir en directo o desenvolvemento das distintas competicións programadas dentro destas xornadas destinadas a impulsar o exercicio físico e destacar a práctica de deporte como clave para ter un estilo de vida máis saudable.