Vítimas, veciños e expertos ferroviarios participan nunha mesa redonda sobre o accidente de Angrois

Vítimas, expertos ferroviarios e veciños do barrio compostelán de Angrois estarán xuntos este mércores nunha mesa redonda para falar sobre o accidente do Alvia que hai case un ano acabou coa vida de 79 persoas.

O debate terá lugar ás 19,00 horas na Facultade de Ciencias da Información da Universidade de Santiago de Compostela (USC) e está organizado por Galicia Confidencial coa colaboración do colectivo audiovisual Lentes Diverxentes.

Nesta xornada, que, segundo os organizadores, pretende ser tamén de homenaxe para todos os que faleceron aquel día, presentarase, ademais, a previa do documental ‘Angrois non esquecemento’, que profunda nas causas e consecuencias desta traxedia.

Á mesa estarán sentados responsables das plataformas de vítimas do sinistro, Cristóbal González pola Asociación de Prexudicados polo Accidente Ferroviario do Alvia de Santiago (Apafas) e Teresa Gómez Limón e Jesús Domínguez pola Plataforma Vítimas Alvia 04155.

Ademais, participarán Anxo Puga e Martín Rozas, veciños de Angrois, e Xosé Carlos Fernández, enxeñeiro de obras públicas e estudioso da alta velocidade en Galicia. Vía telefónica participará José Enrique Villarino, exdirectivo de Renfe.

A este acto asistirán, ademais, numerosas vítimas que están na capital galega para asistir nos próximos días aos distintos actos en homenaxe aos afectados polo descarrilamento do tren Alvia en Angrois.