Uns 450 atletas apuntáronse ao Maratón de Santiaguiño do Burgo

O vindeiro venres, día do Apostol, celébrase o Maratón Popular de Santiaguiño do Burgo, carreira encadrada no Circuíto de Carreiras Populares de Pontevedra, (CCCP) e que organiza o Concello de Pontevedra, a través do IMD, a Asociación Xuvenil Santiago Peregrino do Burgo e conta coa colaboración técnica da Sociedade Ximnástica.

A organización da carreira continúa a bo ritmo e o luns á noite pechouse o prazo de inscrición para a mesma, anotándose un total de 451 atletas, todo un éxito.

Ás 11 da mañá darase a saída desde a Ponte do Burgo, para facer un percorrido rodeando as marismas da Alba, cunha distancia de algo máis de 6 km.

Pero antes a partir das 10 darase a saída ás carreiras para os menores de idade, desde os máis pequenos até os xuvenís; os que se queiran anotar para estas categorías poderán facelo o mesmo día desde as 8:30 da mañá no Pavillón Municipal, que será o punto de referencia para os corredores, recollida de dorsais, servizo de vestiarios, etc.

A recollida de dorsais para os maiores tamén poderá facerse no Pavillón Municipal o vindeiro xoves de 11 a 13 horas e de 17 a 20 horas.

Toda a organización do Maratón de Santiaguiño, lembrará o desgraciado accidente ferroviario de Angrois, que motivou a suspensión da carreira o ano pasado a 2 horas do seu comezo.

Segundo posto de Rafael Fuentes na carreira popular “Carneiro ao Espeto”

O atleta da Sociedade Ximnástica, Rafael Fuentes non puido imporse a Elías Domínguez na segunda edición da carreira Carneiro ao Espeto, que se celebrou en Moraña.

Nos 8 quilómetros do percorrido, con constantes subidas e baixadas, Elías marchouse en solitario nos últimos quilómetros. Aínda así brillante segundo posto de Rafa, que vén dunha lesión que lle impediu adestrar con normalidade desde finais de primavera.