Un total de 21 cativos participaron no XI campionato municipal de pesca infantil de Frades

Participantes no campionato de pesca infantil

Un total de 21 nenos e nenas participaron na undécima edición do Campionato Municipal de Pesca Infantil, organizado polo Concello de Frades este sábado no no río Maruzo, ao seu paso pola área recreativa do Muíño de Campoduro, na parroquia de Céltigos. Moitos dos pequenos estiveron acompañados polos seus pais e nais, de xeito que a actividade reuniu a preto de medio cento de veciños e veciñas.

O XI Campionato Municipal de Pesca Infantil Concello de Frades comezou ás 10:00 horas do pasado sábado 26 de xullo. O Concello de Frades soltara horas antes unhas ducias de troitas, moitas das cales foron rapidamente pescadas polos pequenos, todos eles menores de 16 anos, na primeira hora e media de pesca.

Unha vez rematada a xornada de pesca, o alcalde de Frades, Roberto Rey, e o concelleiro de Medio Ambiente, Manuel Marzoa, fixeron entrega de cadansúa medalla conmemorativa aos participantes, así como unhas lambonadas para todos os pequenos. O acto rematou cun pequeno almorzo a base de empanada e bocadillos de queixo, xamón cocido e chourizo para repoñer forzas.