As cámaras de seguridade non aportan luz ao caso da desaparecida Sonia Iglesias

O xulgado de Instrución número 3 de Pontevedra, especializado en Violencia sobre a Muller, admitiu a solicitude presentada polo avogado de Julio Araújo, parella sentimental da desaparecida e único imputado na causa, para visionar as gravacións efectuadas por dúas as cámaras de seguridade o día da desaparición en agosto de 2010 de Sonia Iglesias.

Con esta petición, o avogado Jesús Santaló, encargado da defensa de Julio Araújo, pretendía comprobar que espazos cubrían os obxectivos desas cámaras e ver si podía extraerse algunha nova achega neste caso. Con todo, á saída do xulgado Santaló sinalaba que os vídeos “carecen de valor xudicial” e neles “non se observa ningún dato significativo”.

Así, trátase das imaxes recollidas polas gravacións de dúas cámaras, unha dun comercio da rúa Oliva e outra da Comandancia da Garda Civil.

En canto á primeira, recollen imaxes de entre as 11,00 e as 12,00 da mañá, hora en que alguén viu a Sonia por última vez nesa zona. A segunda corresponde ao momento da entrega da carteira de Sonia Iglesias.

Este letrado apuntou que a cámara da rúa Oliva non cubre nin o 10% da zona e non se pode comprobar a veracidade da testemuña que afirmou ver a Sonia Iglesias camiñando por esa rúa o día da súa desaparición. Nas imaxes nin sequera se chega a observar a presenza da testemuña, segundo Jesús Santaló.

Un resultado similar sucede no caso do vídeo da Comandancia da Garda Civil. A perspectiva só cobre o acceso á rotonda que procede do Centro Comercial da Barca e tampouco se chega a ver o coche que lanzou a carteira que foi atopada nas proximidades do poboado chabolista do Vao.

CUARTO ANIVERSARIO

A familia confirmou que non ten previsto solicitar máis probas despois de que a Audiencia de Pontevedra desestimase o uso do xeorradar no Monte Castrove (Poio) para tentar atopar o corpo de Sonia Iglesias.

Así mesmo, a familia de Iglesias Eirín confirmou que con motivo do cuarto aniversario da desaparición de Sonia, o próximo 18 de agosto, volverán convocar unha concentración cidadá na Ferrería.