Allariz inicia os festexos do día de Galicia o 24 de xullo

Con motivo da Patria Galega o 25 de Xullo, a vila de Allariz organiza unha festa para comezar a celebrar o día de Galicia dende as súas primeiras horas. Dende as 21:30 do 24 de xullo, o Souto do Folgoso acollerá diversos eventos e festexos. Entre eles o concerto do grupo de música tradicional “Os Melidaos” que correrán a cargo do acompañamento musical.

A lectura do pregón terá lugar ás 12 da noite e este será o acto que de a benvida ao Día de Galicia. Por outra banda, ofertarase a venda de polbo e churrasco para todo aquel que o desexe.

O Souto do Folgoso atópase na estrada Enfestela- A Cal, parroquia de Folgoso, e dende o Concello de Allariz convídase a todo o mundo a celebrar o comezo do día do Patrón con bo ambiente e boa música.