Os hostaleiros de Ourense visitan a D.O. Ribeiro

Visita dos hostaleiros de Ourense á D.O. Ribeiro

O Consello Regulador da D.O. Ribeiro recibiu hoxe a un grupo de hostaleiros ourensáns participantes no Concurso de Pinchos, que dou por concluída a súa actividade onte, onde un total de 44 establecementos ofrecían diferentes bocados aos visitantes a prezos reducidos. Así mesmo, o C.R.D.O. Ribeiro e as súas adegas participaban como colaboradores nesta iniciativa, facendo que os clientes ao consumir un viño do Ribeiro para acompañar o seu pincho, entrase no sorteo de lotes de viño da D.O. Ribeiro.

Esta xornada, que consistiu nun maior achegamento dos visitantes á Denominación de Orixe Ribeiro e aos seus viños, deu comezo cun seminario de introdución á D.O. e aos seus distintos perfís de viños da man do director técnico do C.R.D.O. Ribeiro, Pablo Vidal. Seguidamente participaron nun túnel do viño no Local Social da Madalena, onde puideron probar 20 referencias de viños, entre brancos e tintos. E por último, como peche da xornada, ofreceuse un xantar tradicional no Náutico de Castrelo de Miño acompañado dos diferentes viños, onde o presidente do Consello Regulador, Miguel Ángel Viso lles agradeceu a súa colaboración, xa que “este tipo de accións son beneficiosas para ambas partes, xa que se incrementa a notoriedade e coñecemento dos viños do Ribeiro” .