publicidade hoxe
Publicidade
omeulibro1

A Xunta promove a contratación de persoal nas oficinas de turismo de Sarria, Quiroga e Chantada

PUBLICADO EN: Noticias de GaliciaChantadaLugoQuirogaSarria
A-
A+

A delegada territorial da Xunta en Lugo, Raquel Arias, destacou hoxe que a Xunta, a través de Turismo de Galicia, financia mediante unha liña de axudas específica a contratación de persoal nas oficinas de turismo de tres concellos declarados Municipios Turísticos da metade sur da provincia de Lugo.

Arias destacpu que, a liña de apoio que vén de promover Turismo de Galicia, beneficia directamente os concellos de Chantada, Quiroga e Sarria. A representante do Executivo galego asegurou que estas achegas están dispostas para “manter a calidade no servizo de información turística que se presta nos municipios que contan coa devandita declaración”.

Arias engadiu que con esta medida “estimúlase a contratación de persoal de xeito que se potencie a imaxe tanto dos Municipios Turísticos como de toda a provincia e a Comunidade galega no exterior”. A delegada territorial indicou que con estas achegas se actúa “en colaboración económica cos concellos para divulgar e promover a atención turística neste municipios e no seu contorno”.

A representante do Executivo galego lamentou que outros tres concellos desta área non presentasen sequera a solicitude para concorrer a esta orde de axudas, dotada cun total de 175.000 euros no conxunto da Comunidade. Na situación de non presentar solicitude están os concellos de Lugo, Monforte e Samos.

Aposta turística

A delegada territorial do Executivo galego aludiu á colaboración que fai a Xunta no eido turístico, onde con medidas como esta “fai unha aposta para rendabilizar os excepcionais atractivos cos que conta a zona sur, por exemplo, no eido paisaxístico e no enogastronómico”.

Raquel Arias valorou a importancia “da acción conxunta de cara a promocionar o turismo da Ribeira Sacra e de toda a metade sur da provincia”, xa que “sumando esforzos para a posta en marcha dos servizos necesarios, seremos capaces de definir mellor os obxectivos, priorizar as actuacións e ser máis eficaces na difusión da nosa mensaxe, aforrando ademais en custos”.

Os concellos de Chantada, Quiroga e Sarria beneficiaranse dunha axuda que ten como tope xeral os 8.000 euros por concello, cos que se pode sufragar o persoal específico destas oficinas dende o mes de xuño ata outubro, segundo as solicitudes realizadas polos propios concellos. Os requisitos do persoal contratado serán estar en posesión do título de Técnico Superior en Información e Comercialización Turística ou Técnico Superior en Guía, Información e Asistencia Turística; Técnico en Empresas e Actividades Turísticas ou Grao ou Diplomatura en Turismo ou equivalente homologado.

Con esta liña dáse cumprimento á Lei 7/2011, do Turismo de Galicia, que recolle no seu desenvolvemento que que os municipios turísticos deben ser obxecto de atención preferente nas liñas e medidas de fomento económico establecidas pola Administración da Xunta de Galicia.

Os tres concellos desta área representan a metade dos concellos lucenses que se benefician destas axudas, para as que tamén presentaron solicitude, que foi concedida en tódolos casos, outros tres concellos da Mariña.

18 de xuño de 2014 | 19:21 • Sen comentarios

Comentarios pechados.