Enviar a un amigo
Opinar
ImprimirO aeroporto de Peinador é “bastante máis barato nas súas tarifas” que Oporto
O Ministerio de Fomento asegura que o aeroporto de Peinador é “bastante máis barato nas súas tarifas de aterraxe, nas de aproximación e nas tarifas aplicables aos pasaxeiros” que a media europea e, en particular, que o seu competidor, o Aeroporto de Oporto.
Así indicouno o ministerio en resposta a unha pregunta presentada pola deputada do BNG Olaia Fernández Davila sobre a caída de pasaxeiros no aeródromo vigués, que o Goberno atribúe a diminución do tráfico das compañías españolas” en voos nacionais”.
“Ditas compañías, nestes últimos anos debido á crise económica, tiveron que reestruturar o seu programa de rutas, reducindo a súa actividade naquelas que ofrecen unha menor rendibilidade”, indica o ministerio na súa resposta á deputada do BNG.
En relación a isto, Fomento recorda que a decisión de voar a un determinado destino a adoptan “as propias compañías” en función da rendibilidade que esperan obter, aínda que Aena, “como actor involucrado directamente”, realiza estudios de mercado, analiza con detalle as rutas que presentan maior potencial e contacta coas compañías aéreas.
Adicionalmente, “e co fin de potenciar máis o desenvolvemento da conectividade”, a Lei de Presupostos Xerais do Estado para 2014 recolle “con carácter xeral en todos os aeroportos” bonificacións como a redución do 30 por cento das contías da tarifa por pasaxeiros e seguridade ou a redución do 100 por cento da tarifa de pasaxeiros nas rutas a novos destinos.
UNHA ESTRATEXIA “HARMONIZADA”
Segundo Fomento, para que a competencia dos aeroportos galegos con Oporto “resulte eficaz”, é necesario “implantar unha estratexia harmonizada coas distintas institucións locais involucradas”, como “está previsto que faga o Comité de Coordinación Aeroportuaria”.
“O papel que debe adoptar o xestor aeroportuario nun mercado liberalizado como o do transporte aéreo é o de ofrecer ás compañías aéreas infraestruturas eficientes e de calidade, con capacidade para crecer e a uns prezos competitivos”, explica a contestación de Fomento.
