Nova edición do Xantar Solidario en Cabanas

Máis de duascentas persoas déronse cita este pasado domingo no local social da S.C.R.D. San Mamede de Laraxe para participar no Xantar Soidario que organizou o Concello de Cabanas e co que se reuniron fondos para a Cociña Económica de Ferrol e os Servizos Sociais do propio concello. O Alcalde de Cabanas, Germán Castrillón, amosábase moi satisfeito da gran acollida que tivo esta iniciativa que se levaba a cabo por terceira vez.

Ó finalizar o acto, o edil cabanés quixo dirixir unhas verbas as persoas que alí se xuntaron para agradecerlles a todos este acto soidario, que servirá para poder axudar un pouco a aquelas persoas que se atopan nunha situación complicada nestes tempos que se están a vivir. A idea da corporación local é a de consolidar en próximos anos este evento agardando que a situación mellore nun futuro próximo non xa só para os veciños e veciñas de Cabanas senón tamén de toda Galicia e España.

O Alcalde tivo tamén un agradecemento para as distintas asociacións e clubes locais que se involucraron, como foron as Mulleres de Cabanas Rural, a A.D.C. Poceira Sport, o KDM Cabanas, a A.VV. de Santa Cruz, a Asociación Cabanas Irís e por suposto a S.C.R. D. San Mamede de Laraxe quen foi ademais quen cedeu o espazo para que o acto se levase a cabo. Castrillón fixo unha especial mención a esta colaboración das diferentes asociacións veciñais, que fixo posible levar a cabo o Xantar Soidario, lembrando que moitas veces a unión faise indispensable para poder chegar a metas maiores. Do mesmo xeito agradeceu a colaboración de empresas como Meigas Fóra ou Catering Ferrolterra que axudaron na organización.

Tras estas palabras, Germán Castrillón fíxolle entrega a Antonio Tostado, Presidente da Cociña Económica de Ferrol, do diñeiro xuntado e destinado a súa asociación. Tostado tamén quixo dirixirse ós asistentes, agradecendo o acto e querendo dar un mensaxe de optimismo, asegurando que pronto estes momento de crise pasaran a historia.

O acto tamén se aproveitou para facer entrega a Dolores Romalde Rodríguez dun recoñecemento oficial por parte do Concello de Cabanas ó seu traballo e implicación a favor da comunidade, tras máis de vinte e cinco anos ó fronte da Asociación de Amas de Casa Santa Marta de Cabanas.