Monterrei será o viño oficial na gala de entrega dos Premios Mestre Mateo

Sete adegas da Denominación de Orixe Monterrei participarán mañá nos Premios Mestre Mateo, como viño oficial dunha gala que prevé reunir en Palexco (A Coruña) a un milleiro de persoas do sector audiovisual.

Bodegas Abeledos, Boo Rivero, Gargalo, José Luís Gómez Ibáñez (Valderello), Manuel Guerra Justo (Vía Arxéntea), Pazo das Tapias e Pazos del Rey, serán este sábado as encargadas de representar á denominación no cóctel que seguirá ao evento, onde só se servirán viños da Denominación de Orixe Monterrei.

Monterrei en apoio ao audiovisual galego, así se contempla esta participación posible grazas á invitación cursada pola Academia Galega do Audiovisual, e da que adegas e consello regulador aspiran a incrementar a súa notoriedade nun sector de bandeira en Galicia.

MEDALLA DE OURO EN CHALLENGE DU VIN

Ademais, a Denominación de Orixe Monterrei suma un novo recoñecemento ao seu palmarés, grazas á Medalla de Ouro obtida polo viño tinto Stibadia Barrica 2011 no concurso internacional Challenge du Vin.

Hoxe facíanse públicos os resultados do prestixioso Challenge du Vin (Bourg-Francia), un concurso internacional que recoñece nos seus premios a calidade dos tintos de Monterrei.

Stibadia barrica 2011 de Bodegas Tabú suma así o seu segundo premio do ano, tras ser recoñecido recentemente cun Bacchus de Prata. Este viño, elaborado coas uvas Mencía e Araúxa procede dunha selección das cepas máis vellas (ao redor de 30 anos de idade) que a adega ten en parcelas situadas en distintas zonas do Rosal. Stibadia Barrica é sometido a un proceso de maduración de 9 meses en barricas de carballo, o 80% francés de primeiro uso e un 20% americano de segundo ano. Cunha produción limitada de 1.500 botellas, este viño parece estar a agradar á crítica, algo que satisfai aos propietarios da adega, Javier González e Isaac Dobarrio.