As rosas vendidas no Paseo de Ourense transfórmanse en alimentos para familias necesitadas

Os ourensáns responderon á chamada solidaria da Asociación de Floristas da provincia que, para celebrar o seu día anual, venderon flores a un euro na rúa do Paseo co fin de doar a recadación a fins benéficos. Aínda que a previsión era permanecer na caseta durante todo o día, cara ao final da mañá xa venderan as 2.000 rosas que tiñan preparadas. Este diñeiro, máis os donativos dos transeúntes e compradores, sumaron un total de 2.320 euros que os floristas entregaron ao Banco de Alimentos en forma de produtos de primeira necesidade.

A empresa Cuevas foi a encargada de transformar esa cantidade nos alimentos que porán a disposición da organización benéfica para repartir entre as familias máis necesitadas da provincia.

A entrega fíxose efectiva esta tarde nos almacéns da firma ourensá, e nela participaron Fina Campuzano e Jesús de Deus, presidenta e vicepresidente dos floristas, e Cecilio Santalices, máximo responsable do Banco de Alimentos na provincia.