Uns 400 deportistas daranse cita na primeira proba da Transgalaica 2014 en Cotobade

Uns 400 deportistas procedentes de diversos puntos de España daranse cita este domingo en Cotobade para participar na primeira proba da Transgalaica 2014.

As deputadas Begoña Estévez e Ana Isabel Vázquez, xunto co presidente do Club Ciclista Monteferro, Javier Sánchez, o xerente da Federación Galega de Ciclismo, Ricardo Terceiro, e o alcalde de Cotobade, Jorge Cubela, presentaron esta mañá a proba na Deputación, nun acto no que salientaron o auxe que está vivindo o ciclismo na provincia e en Galicia.

Neste sentido, Ricardo Terceiro destacou o papel do organismo provincial na promoción do deporte en xeral e do ciclismo en particular, incidindo en que o número de actividades deportivas e de federados non para de medrar. Así, indicou que fronte ós 190 eventos que a Federación tivo no pasado ano 2013, este ano serán 214; ó que hai que sumar que as 3.500 licencias ciclistas de hai tres anos están xa a piques de se converter en 6.000, o que demostra a boa saúde do ciclismo en Galicia.

Pola súa banda, Begoña Estévez destacou tamén que a implicación da Deputación co deporte busca tanto a dinamización social e turística dos concellos como, sobre todo, impulsar a igualdade de oportunidades. Nesta liña, lembrou que a institución provincial está levando, a través das  escolas deportivas, a posibilidade de practicar deportes diferentes ós concellos pequenos e medianos do interior que, doutra forma, non terían esta oportunidade.

Incidiu, neste sentido, no esforzo que desenvolven os alcaldes destes concellos que, coma o de Cotobade, están a demostrar un compromiso real coa dinamización dos seus municipios, tanto coas ditas escolas deportivas como apoiando e atraendo ás súas localidades eventos deportivos coma o hoxe presentado.

Un evento co que o rexedor local, Jorge Cubela, se comprometeu plenamente, asegurando que a súa intención é seguir apoiándoo “mentres eu sexa alcalde”, dado que xoga un papel primordial “na dinamización turística e deportiva do concello”.

Neste sentido, subliñou a repercusión das anteriores edicións, “nas que se encheron os bares e locais do concello” porque tanto os participantes coma os espectadores “consumiron en Cotobade”.

Cinco anos consecutivos

Este é o quinto ano consecutivo no que a Transgalaica 2014 comeza en Cotobade, nun circuíto de 27 quilómetros no que os participantes terán que completar dúas voltas, facendo así un percorrido total de 54 quilómetros.

A proba disputarase na categoría masculina absoluta (subcategorías S23, Elite, Sénior, M30, M40, M50, M60 e para as licenzas dun día) e feminina absoluta (S23, Elite, Máster e licenzas dun día). Ademais, e co obxectivo de que poidan sumarse tamén aqueles ciclistas que non desexan entrar na competición propiamente dita pero que si desexarían facer este percorrido, establécese a modalidade cicloturista. Os participantes nesta modalidade farán o mesmo percorrido e co mesmo horario (sairán só uns minutos máis tarde) que a proba de competición, pero sen entrar na clasificación xeral.

A organización agarda acadar os 400 participantes, con 350 en competición e uns 50 en cicloturista.

Nestes momentos son xa 311 os deportistas inscritos, tanto de Galicia coma doutras partes de España (especialmente de Asturias e Castela e León) e o prazo de inscrición permanecerá aberto ata as 20:00 horas do xoves, 6 de marzo.

A proba completarase cunha segunda rolda en Tui, o 6 de abril, e unha terceira en Castrelo de Miño (Ourense), o 4 de maio.