Liberan a un traballador ao que lle caeu unha árbore enriba en Xermade
Os bombeiros de Vilalba excarceraron no mediodía deste luns un operario ao que lle caeu un eucalipto enriba mentres traballaba en Roupar, no Concello de Xermade.
O 112, tras recibir a chamada de alerta dos servizos sanitarios de urxencia e indicar que o traballador estaba atrapado, avisou os bombeiros de Vilalba e tamén solicitou intervención dos efectivos do grupo de emerxencias supramunicipal de Guitiriz e da Garda Civil.
Debido á gravidade do suceso, acontecido ás 12,04 horas, segundo apunta o 112, o helicóptero medicalizado con base en Santiago de Compostela tamén foi desprazado ao lugar, aínda que finalmente o ferido foi trasladado en ambulancia a un centro hospitalario.