A Orquestra Panorama elixe Culleredo para o seu novo espectáculo “Space Tour”

Culleredo acollerá mañá, venres 14, a estrea da nova tempada da Orquestra Panorama. Tras a súa primeira actuación en probas en Silleda, a agrupación inaugurará o seu espectáculo “Space Tour 2014” no recinto multiusos do paseo marítimo do Burgo desde as 23.15 horas.

O evento levará a un gran número de persoas a Culleredo, o que suporá un factor importante para a dinamización da economía local. A concelleira de Promoción Económica, Marta Igrexas, destaca que este tipo de actuacións, coas que o Concello colabora na medida das súas posibilidades, serven de acicate para o comercio local e especialmente para a hostalaría.

O Concello logra acoller o concerto grazas ao recinto municipal co que conta no Burgo, ideal para calquera tipo de evento. O concelleiro de Festas, Juan Carlos Igrexas Lovelle, resalta o seu “emprazamento ideal” para recibir a xente tanto de Culleredo como do resto da comarca, coas consecuentes vantaxes tanto para os promotores polas comodidades do espazo, como para os empresarios da zona pola chegada de visitantes. De feito, a Asociación de Comerciantes tamén quixo mostrar a súa satisfacción pola celebración do evento, unha forma de xerar actividade no municipio, algo moi necesario na realidade actual.

O Concello montará un dispositivo especial de seguridade con motivo do concerto para asistir a calquera necesidade que se presente.

Space Tour

A Orquestra Panorama contará mañá tamén coa participación dos dj´s de Radio Lider Manu Lopez e Charlie. Para esta tempada Panorama deu un paso mais ao incorporar ao elenco xa formado como sempre polos incombustibles Lito e Jorge un grupo de cantantes, bailaríns, performances e acróbatas que tentasen realizar un espectáculo á altura dos públicos máis esixentes sen esquecer a música de baile e a diversión que é primordial para Panorama en calquera evento no que participe.

A nivel técnico incorporáronse este ano novas tecnoloxías ao show que sen ningunha dúbida sorprenderán ao público asistente ás actuacións.

Orquéstraa Panorama tamén quere agradecer ao Concello de Culleredo “por recibirnos desta forma tan cordial que nos fai sentir como en casa nun momento en que os nervios e a emoción da estrea embárganos a todos os compoñentes de Panorama”.