Unha trintena de emprendedores das comarcas das Mariñas-Betanzos recibirán formación empresarial

O director xeral do Igape, Javier Aguilera, participou hoxe, xunto co alcalde de Abegondo, José Antonio Santiso, na sesión de clausura do Itinerario Iniciativa Emprendedora, impulsado pola Consellería de Economía e Industria en colaboración coa Asociación de Desenvolvemento Rural “Mariñas-Betanzos”, unha iniciativa que facilitou nas pasadas semanas a formación empresarial de 28 emprendedores destas comarcas.

Aguilera Navarro destacou o importante impulso que a Consellería de Economía e Industria está a dar á xeración de novos proxectos mediante a Unidade Galicia Emprende, activada no marco da Lei do emprendemento e da competitividade de Galicia. Segundo salientou, nos últimos meses grazas á posta en marcha desta Unidade arredor de 180 emprendedores tiveron oportunidade de probar e avaliar os seus proxectos empresariais, contando con titores expertos, durante os tres últimos meses.

Tal e como recordou Aguilera, a nova Lei do emprendemento pon especial acento na coordinación de recursos e na colaboración entre todas as entidades que traballan no eido do emprendemento. Nesta liña, salientou a colaboración coa Asociación de Desenvolvemento Rural Mariñas-Betanzos, que preside o alcalde de Abegondo, para a posta en marcha da acción formativa clausurada hoxe en Abegondo.

O obxectivo deste itinerario formativo foi motivar no emprendemento aos participantes e achegarlles metodoloxías e ferramentas para o desenvolvemento e a maduración das súas ideas e proxectos empresariais, incluíndo unha análise sobre a viabilidade destes.

Durante cinco sesións formativas teórico-prácticas, os 28 emprendedores participantes tiveron oportunidade de avaliar e avanzar no desenvolvemento das súas ideas de negocio, na súa maioría vinculadas á explotación dos recursos naturais destas comarcas e, nalgúns casos, á agricultura ecolóxica.

O itinerario formativo incluíu o desenvolvemento de cinco módulos que abordaron aspectos como os diferentes modelos de negocio, os plans de empresa ou as necesidades financeiras dos proxectos empresariais. As sesións contaron coa participación de dous empresarios emprendedores que compartiron as súas experiencias na creación e consolidación das súas empresas.

Os participantes valoraron de xeito moi positivo o carácter práctico da formación recibida. A metade dos participantes confían en converter os seus proxectos en empresas a curto prazo.

Precisamente para apoiar as iniciativas de emprendedores ou de novas empresas, o Igape mantén activados programas de axudas como o Galicia Emprende, para proxectos con orzamentos a partir de 35.000 euros e apoios de ata o 50% para investimentos de emprendedores, autónomos ou pemes de ata un ano de actividade.