Sergas e Concello de Cotobade asinaron un acordo para acondicionar un local do Centro Multiusos de Carballedo para o Centro de Saúde

Sinatura do acordo colaborador. Foto: A. Varela

O Edificio Administrativo da Consellería de Sanidade acolleu hoxe pola mañá a sinatura dun acordo de cooperación entre o Sergas e o Concello de Cotobade, mediante o que se establecen as bases para as obras de acondicionamento do local sito na planta baixa do centro multiusos de Carballedo, para o centro de saúde. Asinaron o acordo, a conselleira de Sanidade, Rocío Mosquera Álvarez, e o alcalde do Concello de Cotobade, Jorge Cubela López.

En consecuencia, as dúas partes consideran adecuado o traslado do centro de saúde da parroquia de Carballedo a un novo local sito no núcleo poboacional, co obxecto de mellorar a accesibilidade dos usuarios e dar unha mellor resposta á veciñanza.

O local ten unha superficie de 201,50 metros cadrados e por medio desta sinatura o Concello comprométese ás obras de acondicionamento do mesmo, e o cede ao Sergas para uso sanitario, conforme a un proxecto consensuado. Pola súa banda, o departamento que dirixe Rocío Mosquera comprométese, unha vez aprobadas e rematadas as obras, a trasladar as súas dependencias do centro de saúde emprazado no lugar da Igrexa (Carballedo) á planta baixa do inmoble antes descrito e reverter ao Concello o local onde se desenvolve na actualidade a súa actividade sanitaria.

Ademais, ambas partes comprométense a realizar as xestións pertinentes para que Cotobade forme parte da relación de concellos beneficiarios das axudas necesarias para atender os gastos de mantemento do centro sanitario de referencia (electricidade, calefacción, limpeza e persoal), de acordo co Convenio de Colaboración entre a Vicepresidencia e Consellería de Presidencia, Administracións Públicas e Xustiza; a Consellería de Sanidade; o Sergas e a Fegamp, para a realización de programas de atención e protección da saúde.