O alcalde de Cotobade informa ao delegado da Xunta en Pontevedra dos danos causados polos temporais

Cores Tourís na reunión co alcalde de Cotobade

O delegado territorial da Xunta en Pontevedra, José Manuel Cores Tourís, recibiu esta mañá ao alcalde de Cotobade, Jorge Cubela, quen lle trasladou varias demandas do municipio en relación a diversas infraestruturas viarias e de saneamento.

Deste xeito, analizou co delegado territorial os danos causados polos temporais na estrada que une Carballedo con San Xurxo de Sacos, “e que resultou moi afectada polas fortes choivas”. A este respecto, Cores Tourís trasladoulle que os técnicos da Xefatura Territorial de Medio Ambiente, Territorio e Infraestruturas en Pontevedra avaliarán a situación da estrada de cara a acometer as melloras que foran precisas “unha vez que rematen os temporais e se poida traballar con seguridade”.

A maiores, o alcalde de Cotobade tamén trasladou a Cores Tourís a necesidade dunha depuradora que presenta a parroquia de Paraños, onde o municipio acometeu o saneamento. “Neste lugar viven 75 veciños e, nestes intres, despois de colocar as tubaxes, os vertidos van director a un afluente do Almofrei, polo que necesitaríamos unha depuradora que garanta a calidade da auga que se verte ao río”, explicou Cubela.

O rexedor finalmente engadiu a necesidade da mellora das beirarrúas do núcleo urbano de Carballedo. “Trátase da capital do municipio, onde existen numerosos establecementos comerciais, polo que sería moi importante mellorar a accesibilidade aos mesmos”, matizou Jorge Cubela.

O delegado territorial asegurou que dará traslado das súas demandas á Consellería de Medio Ambiente, Territorio e Infraestruturas de cara a su avaliación.