A Lama, Fornelos e Ponte Caldelas pidenr un obradoiro de emprego para formar a 30 desempregados

Os alcaldes da Lama, Fornelos de Montes e Ponte Caldelas, Jorge Canda, Emiliano Lage e Perfecto Rodríguez, respectivamente, decidiron solicitar de forma conxunta á Xunta de Galicia un Obradoiro de Emprego no que poderían participar 30 persoas, maiores de 18 anos, residentes neste tres municipios e que se atopen en situación de desemprego e que pasarían a percibir, durante este período de formación, o Salario Mínimo Interprofesional.

Este Obradoiro de Emprego, que terá a denominación de “Conca Río Verdugo-Oitavén” formaría durante seis meses a un total de 30 desempregados en diferentes especialidades como a conservación e mellora de montes, no caso dos 10 participantes da Lama; en atención sociosanitaria a persoas no domicilio,  para os outros 10 de Fornelos de Montes, e en actividades auxiliares de viveiros e xardíns, que corresponderán á cota de 10 persoas de Ponte Caldelas.

A actividade formativa do dez desempregados residentes no municipio da Lama centraríase en ensinos teórico-prácticas relacionadas con “Actividades auxiliares en conservación e mellora de montes”. Durante o período de formación os contratados aplicarían os seus coñecementos no acondicionamento das rutas de sendeirismo Foxo do Lobo e Tralos pasos do Río Xesta, así como no acondicionamento da Carballeira Vos Prados en Xesta. Tamén realizarán a repoboación forestal no Polígono Industrial de Racelo, na Lama.

Unha vez rematados o seis meses e comprobada a súa capacitación, recibirán un certificado de profesionalidade nesta materia que lle servirá para mellorar o seu currículo e poder optar en mellores condicións a obter un posto de traballo no mercado laboral.

Por outra banda, o dez contratados residentes no municipio de Fornelos de Montes desenvolverían coñecementos para obter o certificado de profesionalidade en “Atención sociosanitaria a persoas no domicilio” e o seu principal labor práctico centrarase no servizo de axuda no fogar para persoas dependentes, do propio Concello.

Por último, o dez desempregados residentes en Ponte Caldelas que sexan seleccionados para este Obradoiro de Emprego obterían, unha vez finalizado o proceso formativo, un certificado de profesionalidade en “Actividades auxiliares en viveiros, xardíns e centros de xardinaría” e como aplicación práctica do seu proceso de aprendizaxe centrarase na recuperación e mantemento de parques públicos e xardíns municipais e a conservación e posta en valor da área arqueolóxica de Tourón.

Os participantes neste Obradoiro de Emprego recibirían os ensinos teóricos nas aulas de formación que posúe o Concello da Lama, únicas dispoñibles na zona con homologación da Xunta para poder acoller este tipo de escolas taller.

A decisión tomada polo tres alcaldes de solicitar conxuntamente este Obradoiro de Emprego, que terá aplicación práctica en cada un dos municipios, débese a que a orde da Consellería de Traballo que regula a concesión dos Obradoiros de emprego, valora as solicitudes conxuntas de varios concellos. Os alcaldes consideran importante impulsar actuacións tendentes a favorecer a incorporación dos desempregados ao mercado laboral e en implementar sinerxías entre os Concellos co fin de optimizar recursos e favorecer políticas sociais para os cidadáns.

Os rexedores municipais da Lama, Fornelos e Ponte Caldelas esperan que a Xunta de Galicia acceda a concederlles este Obradoiro de Emprego debido á situación socioeconómica desta zona e pola idoneidade desta oferta formativa co fin de capacitar a desempregados en actividades que poidan abrirlles maiores posibilidades no mercado laboral á vez que se contribúe a fixar poboación nestes municipios eminentemente rurais.