A guía turística de Sober estará protagonizada polos Bolechas
O Concello de Sober contará cunha nova guía turística protagonizada polos irmáns Bolechas. Os personaxes visitarán a localidade dentro do Mes do Amandi, previsiblemente o día 5 de abril pola tarde, para presentar o libro Os Bolechas en Sober. Nesa visita farán un percorrido polo Concello no seu automóbil.
A publicación Os Bolechas en Sober fai un percorrido polos lugares máis emblemáticos e polos referentes turísticos do Concello.
O volume recolle a excursión que os Bolechas fan a Sober na que se achegan, xunto co seu can Chispa, a varios dos miradoiros do Canón do Sil, aos viñedos de Amandi, aos muíños dos Chancís ou aos petroglifos de Proendos. O libro inclúe capítulos coa visita a algunha das igrexas románicas do municipio, unha viaxe que os personaxes fixeron no catamarán polo Sil e outra no tren turístico de Doade.
No volumen pode verse como os Bolechas aprenden en Sober a facer unha peza de alfarería de Gundivós, asisten a un concerto da Banda de Música e tamén participando na Feira do Viño de Amandi.
Está previsto que se editen 1.000 exemplares do libro e que os nenos e nenas de Sober reciban un volume de regalo no mes de abril para conmemorar o Día do Libro.
Quen son os Bolechas?
Os Bolechas son desde fai máis de 10 anos a revelación editorial en Galicia e son, á súa vez, os protagonistas da máis importante e exitosa serie da nosa literatura infantil. Con máis de 200 títulos publicados e preto de 1.000.000 de exemplares distribuídos, causan furor e contan cun verdadeira lexión de seguidores entre os máis pequenos, converténdose nun auténtico fenómeno cultural galego.
O seu éxito, en palabras do seu creador, Pepe Carreiro, débese a que os seus protagonistas, seis irmáns (Carlos, as xemelgas Loli e Pili, Braulio, Sonia, o pequeno Tatá e o seu incondicional can Chispa) viven aventuras nas situacións e realidades cotiás dos nenos: a escola, a casa, o parque, o autobús, a praia. Esta proximidade, a súa linguaxe, a súa forma de expresarse, é o que fai que os nenos se sitan cómplices e coprotagonistas da súa aventuras.
Pero ademais, Os Bolechas son cultura raíz e contribúen á divulgación e a formación, mediante o lecer e o divertimento dos escolares de Educación Infantil e de Primaria de Galicia.
Unha singularidade e un trazo diferencial de Os Bolechas é que é unha serie creada e desenvolvida en Galicia e que ademais utiliza o galego na súa versión orixinal, xogando un importante papel na promoción e difusión do idioma.