A Garda Civil detén ao marido da muller desaparecida o domingo en Vilaboa
Axentes da Garda Civil detiveron ao marido da muller desaparecida o domingo en Vilaboa (Pontevedra) por un suposto delito de detención ilegal.
Segundo informaron fontes próximas á investigación, o home detido pasou na tarde do luns a disposición do Xulgado de Instrución Número 3 de Lugo, que dirixe a investigación.
Así, o luns a xuíza de Lugo Ronsel San José tomou declaración ao detido e a Garda Civil iniciou as pescudas oportunas ordenadas polo xulgado instrutor.
A muller, de 37 anos de idade, desapareceu o domingo en Vilaboa e, segundo sinalou a Garda Civil, “terceiras persoas” indicaron que “o ano pasado puido sufrir un episodio de malos tratos no ámbito familiar”.
A denuncia da desaparición desta muller, natural do municipio pontevedrés de Poio e con residencia en Lugo, foi presentada o mesmo domingo na Comandancia da Garda Civil de Pontevedra por un familiar.
Así, abriuse unha investigación para esclarecer a súa desaparición, cualificada pola Garda Civil como ‘de alto risco’, posto que, aínda que non constan antecedentes de denuncias por violencia de xénero, terceiras persoas aseguraron que o ano pasado a muller puido sufrir un episodio de malos tratos no ámbito familiar.
A desaparecida, que fora contactada no seu día por efectivos policiais, non quixo presentar unha denuncia e, de feito, negou posibles episodios violentos.