O Festival Ortigueira contará coa actuación de Milladoiro na celebración da súa trixésima edición
O alcalde de Ortigueira (A Coruña), Rafael Girón, avanzou esta tarde en Fitur algunhas liñas básicas do Festival Ortigueira 2014, principal reclamo turístico do Ortegal. O evento musical, unha das citas de referencia da música celta en Europa, iniciará nova etapa en xullo coincidindo co seu trinta edición. No cartel, e nunha chiscadela ás orixes do evento, anúnciase a presenza de Milladoiro.
O emblemático grupo galego volverá pisar o escenario de Ortigueira tras seis anos de ausencia. Así o desvelou en primicia durante o principal foro turístico de España o rexedor ortegano, antes de lembrar a orixe paralela do festival e a banda, cuxo nacemento se fraguou na primeira edición do evento, no ano 1978, tras a confluencia das dúas agrupacións nas que militaban os seus fundadores.
Milladoiro, que foi nome fixo nos primeiros carteis e volveu en 2000 e 2007, xa como auténtica institución da música folk galega, é desde hoxe a primeira peza confirmada do próximo festival que, “para adaptarse ao calendario universitario” pasará a desenvolverse do 17 ao 20 de xullo.
Así mesmo, Girón subliñou o empeño do Concello de Ortigueira por renovar a oferta musical e de lecer do evento. Neste sentido, sentenciou que a edición 2014 marcará o inicio dunha nova etapa, aínda que sen renunciar aos acenos de identidade de sempre: gratuidade, espírito libertario, acampada multicultural, calidade musical e, en definitiva, festa en estado puro nun espazo natural privilexiado.
“O noso reto é garantir a eses miles de persoas que nos visitan (50.000 o pasado ano) unha experiencia autenticamente única”, sostivo o alcalde, na súa comparecencia ante os operadores turístico e os medios de comunicación, apoiado pola delegada provincial da Xunta na Coruña, Belén do Campo, nun acto no que, evidentemente, lembrouse o carácter estratéxico da cita folk, declarada desde 2005 Festa de Interese Turístico Internacional, para a economía da comarca de Ortegal e o seu sinal como marca de país.
Por iso, o mandatario local, Rafael Girón agradeceu a colaboración de cantas administracións e firmas patrocinadoras fan posible o certame e concluíu, convidando ao público asistente a gozar do Festival Internacional do Mundo Celta e aproveitar a estancia en Ortigueira para descubrir a paisaxe, a tranquilidade, gastronomía e a hospitalidade dos veciños do municipio.