Deportes abre o prazo de inscrición na Campaña de Esquí da Deputación da Coruña

A Concellaría de Deportes abre o prazo para anotarse na Campaña de Esquí que impulsa Deputación da Coruña, dentro da cal se ofertan tres prazas a Ortigueira no fin de semana do 14 ao 16 de febreiro.

A iniciativa desenvolverase na estación invernal de San Isidro (León) e está aberta a nenos/as nados nos anos 2000, 2001, 2002 e 2003. Os participantes gozarán dun fin de semana con aloxamento e manutención, a demais dos correspondentes cursos de esquí. O custo de participación será de 36 euros, asumindo a entidade provincial o groso dos gastos.

Apuntan desde o departamento municipal que as familias interesadas en que os seus fillos/as gocen desta actividade deportiva e lúdica deberán entregar nas oficinas xerais do consistorio ou ben na piscina municipal o boletín de inscrición debidamente cuberto até o próximo día 28 de xaneiro.

Dado que o número de prazas é moi reducido, no caso de que demanda supere a oferta, a selección dos beneficiarios/as realizarase mediante sorteo público ante a secretaria municipal.