CIM de Ortigueira e a Escola Galega de Saúde abren o prazo de inscrición nun taller sobre diabetes e alimentación

A Concellaría de Benestar Social, a través do CIM de Ortigueira, inicia o 2014 retomando o programa de saúde, desenvolvido en colaboración coa Escola Galega de Saúde para cidadáns. E faio programando un taller centrado na diabetes, destinada a mellorar a información acerca desta enfermidade e para o que se acaba de abrir o prazo de inscrición.

A actividade, totalmente gratuíta, desenvolverase o 24 de xaneiro, entre as 16:30 e as 19:30 horas, no Centro de Participación Social de Ortigueira (Antigo hospital de San Roque); e está destinada a todos os veciños e veciñas que queiran asistir, aínda que resultará de especial interese para pacientes e familiares de enfermos.

O obxectivo, ampliar e optimizar a información e comprensión da enfermidade e proporcionar a  os coidadores e aos propios enfermos habilidades e coñecementos necesarios para mellorar a calidade de vida na contorna familiar.

Neste sentido, durante a charla, impartida por Dores Otero Fernández, enfermeira  do Complexo Hospitalario de Santiago, abordaranse cuestións como a actualización en diabetes, os coidados e control das glucemias, recomendacións de alimentación e recomendación e coidados dos pés.

Desde o departamento municipal apúntase que, dado que existe un límite de prazas, as persoas interesadas haberán de anotarse ben na propia plataforma online da Escola Galega de Saúde para cidadáns, como nas dependencias do Centro de Información á Muller (teléfono 981402542). A actividade está aberta a veciñas/vos de Ortigueira, Cariño e Mañón, municipios nos que presta servizos o organismo ortegano.

Lembran desde a Concellaría de Benestar Social que a Escola Galega de Saúde para Cidadáns, dependente da Xerencia do Sergas está orientada á formación de pacientes, familias e cidadáns en materia de saúde, co obxectivo de reforzar a súa calidade de vida e potenciar a súa participación segura nas decisións sobre os seus procesos e enfermidades, así como facilitar que coñezan os servizos sanitarios para contribuír a un uso eficiente dos mesmos. Subliñan ademais a excelente acollida que os cursos realizados na localidade (primeiros auxilios, cancro de mama, menopausa, violencia de xénero e úlceras por presión) tiveron durante o pasado ano, con máis de douscentos participantes.