Cambre, Culleredo e Cerceda consensúan melloras no transporte metropolitano

Reunión dos representantes de Cambre, Culleredo, Cerceda e a delegada territorial

A directora xeral de Mobilidade, Camino Triguero, e a delegada territorial da Xunta na provincia, Belén do Campo, mantiveron esta mañá unha reunión de traballo cos alcaldes de Cambre, Culleredo e Cerceda no que acordaron diversas melloras no funcionamento das liñas de transporte metropolitano que prestan servizo a estes municipios co fin de adaptalos ás necesidades dos usuarios e facilitar o acceso ao transporte dun maior número de persoas.

Así, no encontro, no que tamén estiveron presentes varios técnicos do departamento autonómico, consensuáronse axustes nos horarios dunha das liñas de interese metropolitano que afecta ao concello de Cerceda, dos que tamén se beneficiará Culleredo, e a ampliación de dúas paradas no municipio de Cambre. Estas medidas comezaranse a aplicar de forma inmediata, segundo confirmou a directora xeral.

Do mesmo xeito, os responsables locais comprometéronse a traballar para mellorar as frecuencias das liñas de interese municipal, co obxectivo de adaptalas ás incluídas no Plan de Transporte Metropolitano e así mellorar a coordinación do servizo e a atención aos cidadáns.

Por último, Triguero e Do Campo amosaron a súa vontade de seguir a traballar e aumentar a colaboración coas entidades locais para mellorar a mobilidade da poboación a través do Plan de Transporte Metropolitano, que garante un transporte público e competitivo e permite coordinar mellor os medios de transporte urbanos e interurbanos, mediante o programa de transbordos gratuítos para os viaxeiros, o incremento da oferta de servizos e o programa de mellora da información e das infraestruturas.