Comezan as clases no obradoiro de hostalería do Salnés

Presentación do Obradoiro de Hostalería

24 alumnos iniciaron hoxe, nas instalacións da Deputación de Pontevedra na Lanzada, o 10º Obradoiro de Hostalería, que, promovido pola mancomunidade do Salnés, foi no seu día o pioneiro en España.

O curso, cun orzamento de 270.000 euros, durará seis meses, desde o mércores 16 de outubro ata a Semana Santa. Os alumnos-traballadores recibirán unha alta formación profesional con vistas á súa inserción laboral; nos últimos anos entre o 80% e o 90% do alumnos foron contratados ó remate das clases. O centro imparte formación en dous módulos: cociña e camareiro de restaurante.

O presidente da mancomunidade e alcalde de Vilanova de Arousa, Gonzalo Durán, destacou a importancia da hostalería no Salnés, pero lembrou que tiñan que mellorar dous aspectos: a profesionalidade e a captación de turismo exterior, pois, na actualidade, resulta caro viaxar a Galicia. Neste sentido barallou a posibilidade –en tanto non se coordinen os voos ás terminais aeroportuarias galegas– de potenciar a chegada de turistas en autobús por Porto.

Pola súa banda, a deputada provincial Marta Iglesias destacou a importancia dun sector, o turismo, que na provincia representa o 12% do seu PIB e ocupa a 40.000 persoas.

A deputada provincial afirmou que a saída da crise “premiará os mellor formados” e lembrou o intenso labor que, con ese fin, desenvolve a Deputación de Pontevedra a través dun investimento de máis de 15 millóns de euros en contratos laborais e bolsas para mozos titulados en empresas e concellos, así como noutros proxectos formativos coma Aquelando, que outorga certificados de profesionalidade en materias coma a atención sociosanitaria, o comercio, as vendas, entre outras.