publicidade hoxe
Publicidade
omeulibro1

‘Os Axóuxeres’ levarán historias, música e palabras a 24 concellos da Rede de Dinamización Lingüística durante este outono

Dirixido aos máis pequenos da casa, o obxectivo deste programa de dinamización lingüística é apoiar as familias na transmisión interxeracional do galego.

Estrea da nova edición do programa de dinamización lingüística 'Os Axóuxeres'

Estrea da nova edición do programa de dinamización lingüística ‘Os Axóuxeres’

Estreouse a nova edición do programa de dinamización lingüística ‘Os Axóuxeres’, dirixido á xente miúda da casa. O obxectivo desta iniciativa é apoiar as familias na transmisión interxeracional do galego, ao tempo que se contribúe a que as nenas e os nenos asocien desde as idades máis temperás a lingua galega con experiencias positivas, alegría e xogo.

Para iso, e da man de Caramuxo Teatro – compañía pioneira no teatro para bebés en Galicia- propón un espectáculo que xoga coa curiosidade infantil de saber que hai dentro das casas. Nel, os protagonistas, que viven nunha construción illada, van descubrindo pouco a pouco os fogares dos seus novos veciños. Hortensia, a florista, en cuxa residencia recende moi ben; Telmo, o equilibrista; Arabela, a cantante de ópera; o señor Antón, un vello mariñeiro… e Rita, a gata de Marcelina, que vén de visita á hora da merenda.

Esta é a sexta edición dos Axóuxeres, programa que crea un espazo de ocio en galego e que pon a disposición das familias materiais para continuar xogando e cantando na nosa lingua propia ao finalizar o espectáculo teatral e musical. As cancións poden descargarse de balde en www.xunta.es/linguagalega/os_axouxeres_2013.

‘Os Axóuxeres’ percorrerán 24 dos concellos da Rede de Dinamización Lingüística (RDL), en concreto os de Ourense, Santa Comba, Arteixo, A Coruña, Ames, Burela, Viveiro, Ferrol, Xinzo de Limia, Verín, O Pereiro de Aguiar, Moaña, Redondela, Teo, Ribeira, Vilalba, Mos, O Porriño, Pontedeume, O Grove, Vilagarcía de Arousa, Silleda, A Estrada e Santiago de Compostela, poñendo a disposición – totalmente de balde- de arredor de 2.400 familias con bebés e cativos menores de 6 anos unha oferta de lecer na lingua propia de Galicia.

Ao acto inaugural asistiron o conselleiro de Cultura, Educación e Ordenación Universitaria, Xesús Vázquez Abad, e mais o secretario xeral de Política Lingüística, Valentín García.

Reserva previa

O calendario completo de actuacións pode consultarse no web da Secretaría Xeral de Política Lingüística (www.xunta.es/linguagalega/calendario_os_axouxeres_2013). Para garantir a seguridade e a comodidade dos máis pequenos, a capacidade de cada espectáculo está limitada a 50 nenos con cadanseu acompañante adulto. As persoas interesadas en participar poderán inscribirse previamente, de luns a venres e en horario de 10.00h a 14.00 h, no teléfono 610 641 570. Admitiranse reservas desde unha semana antes de cada sesión.

28 de setembro de 2013 | 23:54 • Sen comentarios

Comentarios pechados.