publicidade hoxe
Publicidade
omeulibro1

Abadín, A Fonsagrada e O Incio aforrarán 41.000 euros ó ano na factura eléctrica

PUBLICADO EN: Noticias de GaliciaA FonsagradaAbadínGaliciaLocalLugoO IncioProvincias
A-
A+

Os Concellos de Abadín, A Fonsagrada e O Incio aforrarán en conxunto preto de 41.000 euros ó ano na súa factura eléctrica cos equipamentos para a mellora da eficiencia enerxética que a Deputación de Lugo lles facilitará e instalará de maneira totalmente gratuíta. Segundo informou o voceiro provincial socialista, a Xunta de Goberno deste venres aprobou a adquisición de dito material, un total de1.000 compoñentes, por valor de preto de 97.000 euros, que comezarán a colocarse a finais de maio e estarán en funcionamento un mes despois.

Xunto a Abadín, A Fonsagrada e O Incio, outros 34 municipios lucenses obterán beneficios semellantes por terse adherido á nova liña de cooperación impulsada polo organismo provincial para axudar ós Concellos a reducir o gasto enerxético en dependencias municipais, “tendo en conta que esta é unha das principais inquietudes das entidades locais e que a factura eléctrica supón unha gran carga económica para as súas arcas”. A Deputación ofreceu hai un ano este programa de aforro ós 47 Concellos que forman parte do denominado Club dos Renovables (que leva consigo outras iniciativas de aforro medioambiental) e finalmente sumáronse de xeito voluntario 37 municipios de todas as cores políticas.

O proxecto, a custe cero para os municipios, está financiado ó 80% por fondos europeos a través do programa Lug02, e consta de dúas partes:

- Unha primeira, xa completada, que consistiu na realización de auditorías nos 37 Concellos para determinar en que puntos e con que equipamentos se pode reducir o consumo enerxético en dependencias municipais. Asumindo o custe das auditorías, a Deputación aforrou 10.000 euros a cada entidade local, pois este é o prezo medio que teñen no mercado este tipo de traballos.

- A segunda fase, que comeza agora, consiste na dotación dos compoñentes de eficiencia enerxética que as auditorías determinan para rebaixar o gasto eléctrico. Para elo, a institución luguesa xa aprobou hai case un ano un acordo marco mediante o que pactou con 6 empresas a compra de materiais como lámpadas LED, válvulas termostáticas, programas de rego ou detectores de presenza, obtendo deste xeito prezos moito máis vantaxosos.

Manuel Martínez subliñou que os Concellos adheridos ó plan da Deputación “benefícianse de tres grandes vantaxes: aforran o gasto das auditorías; aforran o gasto dos equipamentos técnicos; e conseguen importantes aforros económicos na súa factura eléctrica”.

A instalación comeza en Abadín, A Fonsagrada e O Incio

Abadín, A Fonsagrada e O Incio son os tres Concellos nos que arrancan os traballos de instalación dos equipos, e progresivamente levaranse a cabo nos restantes municipios adheridos ó programa. Deste xeito, a Xunta de Goberno aprobou na sesión de hoxe a adquisición de 1.015 dispositivos para estes tres municipios por valor de 96.821,27 euros, aínda que, tendo en conta as vantaxes que reporta o acordo marco, o investimento final será con toda probabilidade menor.

Melloras no alumeado público exterior e interior

As melloras implantaranse principalmente no alumeado público exterior e no dun edificio de titularidade municipal, elixido polos propios Concellos. Colocaranse nos 3 Concellos un total de 975 lámpadas de baixo consumo; 6 reloxos astronómicos que serven para programar o acendido do alumeado de maneira automática; 4 descargadores trifásicos para evitar picos de tensión eléctrica; 1 redutor de fluxo lumínico e 29 válvulas termostáticas.

Desta forma, Abadín, A Fonsagrada e O Incio conseguirán en conxunto reducir o consumo en 285.000 quilovatios hora ó ano, o que supón un aforro económico anual estimado de preto de 41.000 euros, isto é, unha media de 13.600 euros por Concello, o que contribuirá a mellorar a súa situación financeira. Estas actuacións implican tamén importantes beneficios medioambientais, pois evitan a emisión de 105 toneladas de CO2 anuais, equivalentes ó gasto eléctrico anual de 83 familias; ó consumo anual de 423 barrís de petróleo, e á plantación de 5.286 árbores.

A Deputación, máis ambiciosa

O voceiro socialista do Goberno provincial subliñou a importancia do financiamento por parte da Deputación destas medidas de aforro, pois a factura eléctrica dun Concello medio da provincia, de 5.000 habitantes, é de arredor de 200.000 euros ó ano, o que supón unha gran carga económica. “Tamén hai que ter en conta que para un Concello é moi difícil asumir por si só o custe dunha auditoría enerxética, e a compra e instalación do material”, engadiu.

Así mesmo, destacou que o plan provincial é “moito máis ambicioso” que o doutras administracións, como a Xunta, pois, mentres no caso das iniciativas autonómicas “non se lles fan as auditorías gratis e os Concellos teñen que achegar o 30% do custe dos equipamentos, no plan da Deputación dámoslles todo feito e gratis: auditorías e dotación de dispositivos”.

Os 37 Concellos beneficiados

Os 37 Concellos pertencentes ó Club dos Renovables que se apuntaron voluntariamente o plan de aforro enerxético son os seguintes: O Incio, Quiroga, Negueira de Muñiz, Pol, A Pobra do Brollón, Cervantes, Baralla, Monterroso, Abadín, O Valadouro, O Vicedo, Ribadeo, Palas de Rei, Sober, Portomarín, Láncara, Xove, Barreiros, Navia de Suarna, Riotorto, Pedrafita, Guitiriz, A Pastoriza, Castroverde, Becerreá, Rábade, Ribas de Sil, A Fonsagrada, A Pontenova, Guntín, Friol, Meira, Sarria, Trabada, Samos, Monforte de Lemos e Viveiro.

Novas actividades medioambientais

A Xunta de Goberno aprobou, por outra banda, contratar a organización de actividades lúdicas e didácticas sobre os recursos medioambientais da provincia, vinculadas coa aula móbil do barco Muralla de Lugo, unha iniciativa financiada nun 80% por fondos europeos a través do programa Lug02, coa que a Deputación difunde as posibilidades económicas que ten o medio ambiente na provincia.

A programación de actividades terá 6 meses de duración e constará de preto de 30 eventos diferentes, cunha duración media de dúas xornadas cada un, nas que se difundirá o patrimonio natural, cultural e etnográfico da provincia, en especial das Reservas da Biosfera Terras do Miño e Os Ancares, e da comarca do Courel, en tódolos puntos nos que recale o Barco Muralla.

Posta en valor da finca de Tor

A sesión de hoxe da Xunta de Goberno deu luz verde á contratación dun servizo para o mantemento das 182 hectáreas de superficie da finca do Pazo de Tor, en Monforte, por valor de 42.800 euros e por un período de 1 ano, prorrogable a outro. O obxectivo é manter en perfectas condicións e poñer en valor este complexo con traballos de limpeza e coidado das instalacións, dos montes, e das zonas verdes e de ocio da finca de Tor.

Comunidades Veciñais

A Xunta de Goberno provincial aprobou ademais 8 contas xustificativas de obras do Plan de Comunidades Veciñais do 2012. Trátase de traballos de mellora e dotación de servizos e infraestruturas rurais por un valor total de 78.812 euros, acometidos en núcleos dos Concellos de Abadín, Castro de Rei, Antas de Ulla, O Incio, Lugo, A Pastoriza e Riotorto.

26 de abril de 2013 | 12:51 • Sen comentarios

Comentarios pechados.